وقفة مصرية

وقفة مصرية

1 مشهدخارجى فى ارض زراعية واسعة ..

رجل متوسط الحال يقف مرتديا قميص و بنطلون فى وسط الارض الزراعية ..

صوت الرجل و هو يقول : نفسى فى رعاية احسن ، نفسى اتعالج كويس ، نفسى الاقى سرير بسهولة ، نفسى الاقى العلاج اسهل من كده .

صوت خلفى يعلن : علشان كل ده يحصل ، لازم تدخل مستشفى خاص و ابعد عن المستشفى الحكومى .

( اصحاب المستشفيات الخاصة يؤيدون القرار الرشيد بحملة وقفة مصرية )

2 مشهد خارجى فى مكان واسع مزدحم بالطلاب يجرون و يجرون حقائب مدرسية ثقيلة خلفهم فى فناء المدرسة ..

رجل متوسط الحال ايضا يقف بقميص و بنطلون فى وسط الفناء المدرسى ..

صوت الرجل و هو يقول : نفسى اولادى يتعلموا كويس ، نفسى يتعلموا يقرأوا و يكتبوا فى مكان يسعهم ، نفسى يفهموا كويس .

صوت خلفى يعلن : علشان كل ده يحصل ، لازم تديهم دروس خصوصية و متوجعش قلبنا .

( المدرسون الخصوصيون يؤيدون حملة وقفة مصرية )

3 ارض زراعية واسعة جدا ، مزروعة و مملؤة بالخضرة هذه المرة ..

فلاح بسيط هذه المرة يقف فى وسط الشاشة و من خلفه الارض الزراعية ، يكتسى بجلباب يناسب المكان ..

صوت الفلاح يقول : نفسى اعرف ازرع كويس ، الاقى سماد و مخصبات بسهولة ، زرعى و خيرى يكفى اولادى .

صوت خلفى يعلن : علشان كل ده و اكتر ، اعرف لك تاجر او مهندس زراعى من اللى بيشتغلوا فى السوق السودا .

( تجار السوق السودا يؤيدون حملة وقفة مصرية )

4 مكان مزدحم ، طوابر كبيرة و كثيرة ، يبدوا انها مشاجرة على العيش ..

احدهم يخرج مطوة و يغز الزبون اللى واقف قدامه علشان يوصل اسرع ..

صوت الرجل يقول : نفسى اعرف اروح اخد العيش من غير ما اضطر انى اغز حد .

صوت خلفى يعلن : اشترى عيش من الفرن الخصوصى اللى قدامه ، او من اللى متهرب دقيقه .

( مفتشو التموين على الافران يؤيدون حملة وقفة مصرية )

5 مشهد داخلى فى منزل متواضع و اسرة من سبع افراد ملتفة حول التلفزيون ، كل منهم يريد ان يشاهد قناة معينة ..

احدهم يخطف الريموت كونترول ، يلوح فى وجه الجميع ..

صوت ابيه يقول : نفسى نخلص من المشاكل دى ، نعرف نتفرج براحتنا .

صوت خلفى يعلن : طب و ايه اللى كان يجبرك على كده ، اشترى تلفزيونين تانيين جنب الاولانى .

( اصحاب المحلات الكهربائية يؤيدون حملة وقفة مصرية )

6 شارع طويل ممتد ، السيارات تقف مكانها ، الكل يصدر كلاكس من السيارة يدل على ملله و كثرة التوقف ..

احد الركاب ينفخ بصوت عالى ، زوجته تمسح جبينها بمنديل ورقى فى يديها ، الاطفال فى الخلف يتشاجرون ..

صوت الراكب يقول : نفسى اعرف امشى طوالى ، تبقى سكتى خضرة كده على طول من غير اشارت و زحمة .

صوت خلفى يعلن : الزحمة الكتير و موكب المسؤول مش المفروض يعطلك ، اغمس العسكرى بتاع المرور بعشرة جنيه ، عدى ، ده غلبان .

( عساكر المرور يؤيدون حملة وقفة مصرية )

7 رجل بجلباب بسيط يجلس على القهوة مغمض العينين ، متكأ على يديه ، يبدو و كأنه نائما ...

احد الموجودين على القهوة ، يوجه الحديث اليه قائلا : شكلك مش عارف تنام و لا ايه ؟

الرجل : و لا حاجة ، معرفتش انام فى بيتنا من الدوشة بتاع العيال .

صوت خلفى يقول : لو العيال كتير و مش عارف تنام منهم ، متأجر اوضة فى اى حتة علشان تنام .

( اصحاب الفنادق يؤيدون حملة وقفة مصرية )