قال مؤخرا الشيخ صفوت حجازى ان الالتراس لم يكن لهم دور فى الثورة ، لن ارد عليه الا بشهادة عمرو عز احد اعضاء ائتلاف شباب الثورة مع الاعلامى احمد منصور فى شاهد على الثورة ( الذى سجل فيه الشيخ صفوت حجازى )
أحمد منصور: عمرو كان في أي تجمعات جاية من جهة إمبابة أو كده برضو ولا إنتوا ركزتوا إن الحركة بتاعة كل المناطق دي حتبدأ من ناهية؟
عمرو عز: إحنا كنا مخططين في الأول خالص إن يبقى في تجمع من بولاق من ناهية وفي تجمع من إمبابة، وفي تجمع من أرض اللوا، لكن حبينا إن إحنا نركز قوتنا كلها في مكان واحد، في مجموعات طلعت من إمبابة فعلاً بس كانت أعداد قُليلة أنا.. نسيت حتة قبل الموضوع ده إنضمام فصيلين مهمين جداً جداً جداً للثورة المصرية في الوقت ده مش الإخوان، شباب الإخوان، وشباب التراس أهلاوي وزملكاوي، كان في أشخاص من عندنا أعضاء في التراس أهلاوي وأعضاء في التراس زملكاوي..
أحمد منصور: ممكن تقول لنا إيه التراس يعني لأن كل المجموعات ديه مجموعات سياسية لكن دول..
عمرو عز: الترنس دول مشجعين بتوع مشجعين منظمين بتوع الأهلي ومشجعين منظمين بتوع الزمالك إللي هم متعصبين..
أحمد منصور: بالضبط إللي هم دول لازم في كل match يروحوا لازم يتواصلوا مع بعض زي الجروبات زي التنظيم بالضبط..
عمرو عز: عندهم تنظيم وعندهم تنظيم مهم جداً يعني الولاد دول بعملوا شوية حاجات في المتشات إحنا ما نقدرش نعملها حتى أكبر فصيل سياسي في مصر أنا أتحداه أنه يقدر يشتغل بالتنظيم ده، أنا في مرة بكلم ولد منهم في صحفي إديلو تصريح قلي أنا anti media ، يعني مش بيجري بيدلي تصريح لأ هو ممنوع عليه هو لسه ما وصلش لدرجة أنه هو يقدر يدلي تصريحات للـ media فبقولي أنا ...
أحمد منصور: مش زي الشباب إللي عمالين بيجروا كلهم على وسائل الإعلام وكل واحد عامل زعيم سياسي..
عمرو عز: شباب الترنس الأهلاوي والالتراس الزمالكاوي إحنا لما طلع موضوع إنه إحنا مش حنرفع شعاراتنا و إحنا نازلين عشان مصر إبتدينا نتواصل معاهم ونحاول نقنعهم أنهم ينزلوا كان الموضوع غاية في السرية عشان لو الأمن الأمن برضو كان عارفهم بالإسم ..
أحمد منصور: في ناس منكم أهلاوية بيكلموا الأهلاوية وناس زمالكاوية بيكلموا الزمالكاوية
عمرو عز: وكان الالتراس دول معروفين بالنسبة للأمن عشان برضو بيعملوا شغب كثير عند الإستاد وفي المتشات وكده فكان في خطورة أوي عليهم من أنهم حيشاركوا في اليوم، فالمشاركة في اليوم تمت بشكل سري داخلي ما بينهم وبين بعض وكان لهم دور كبير أوي يوم 25 في اقتحام ميدان التحرير، الولاد عندهم تكتيكات لاختراق الأمن.
أحمد منصور: طبعاً دول بتوع إللي بيجتمعوا في مكان واحد فلازم..
عمرو عز: بيستخدموها في الاستاد وبيستخدموها مع الشرطة بعد الالتراس بعد الماتش فأنا لما قعدت معاهم جلسة..
أحمد منصور: على فكرة محدش إتكلم عن دورهم خالص تقريباً في الثورة يعني..
عمرو عز: للأسف أنا في.. الولاد دول كان لهم دور كبير يوم 26 و27 وده إللي حاجي فيه بعد كده، في بعض الفصائل السياسية إللي أنا متأكد وكنت موجود معاهم وكنت بمثل معاهم بشكل مباشر نسبوا الكلام ده ليهم و 26 و 27 ده شغل الالتراس أهلاوي و الالتراس زمالكاوي مش شغل أي حد سياسي، الولاد دول إحنا حاولنا نتواصل معاهم بقدر الإمكان عشان إنه إحنا نازلين عشان مصر فوافقوا بالأول بشكل معلن أنهم هم حيشاركوا وبعد كده أعلنوا على الجروبات بتاعتهم على face book وعلى الموقع ما أطن أنهم مش حيشاركوا لكن هم قعدوا معانا وقالوا إحنا حنشارك وده كلام للإعلام إحنا منظمين ونقدر نتواصل مع بعض ونقدر ننزل..
أحمد منصور: وبعدين أنت رحت هنا وهنا عشان..
عمرو عز: المصادفة الغريبة أنه كان في اجتماع مع الالتراس أهلاوي واجتماع مع الالتراس زمالكاوي في نفس الوقت وإجاني خبرين في نفس الوقت أن الإثنين حيشاركوا، يعني أنا قلت لو واحد منهم قال لي أنه هو حيشارك حروح للثاني أقول له أحطه تحت الأمر الواقع، الالتراس أهلاوي حيشارك إنت يا زمالكاوي حتشارك ويلا إيه..
أحمد منصور: فهم أخذوا قرار.
عمرو عز: فهم الإثنين أخذوا قرار يعني في يوم واحد جاني أنه هم حيشاركوا في نفس اليوم وده كان قبل الثورة.. قبل 25 يناير بحوالي 5 أيام يعني خلاص قرار نهائي أن المجموعات حتشارك لكن بشكل فردي مش بشكل الالتراس يعني مش الالتراس هو إللي حيشارك لأ مجموعات الالتراس هي إللي حتشارك، يعني مش حبقوا جايين كأنهم جاين match لأ ده حييجوا كأنهم..
لينك قناة الجزيرة للقاء
http://www.aljazeera.net/NR/exeres/7DECA24E-2D3C-4B50-8D1F-AE8A24248E2A.htm
ليست هناك تعليقات:
إرسال تعليق