الغرب يهمه مصلحته وفقط

الغرب يهمه مصلحته وفقط

 بالبلدى كده و بدون تحوير للكلام و الدخول فى تفاصيل كتيرة ..

ممكن تكون بدأت تشوف المشهد السياسى دلوقتى بعد 30 يونيو فى مصر و فى العالم كله ناحية مصر وتستغرب ..

ازاى الناس دى كانت بتكرهنا وعايزة تفرض علينا عقوبات وفجأة زى ما بنقول .. جابوا ورا !!

فى ناس ميهمهاش تفسر ده وفرحانين وخلاص ، لكن من وجهة نظرى لازم نفهم ونتعلم من اللى بيحصل والا هنفضل مكانا على طول .




اوعى تفتكر ان الغرب دلوقتى بيساند مصر وبدأ يغير رأيه علشان يا عينى و ياحرام بدأ يشوف جرائم الجماعة ، لا علشان بدأ يشوف الفيديوهات اللى شايلين فيها سلاح ، لا علشان المفكرين و الادباء اللى شرحوا وجهة نظر الشعب المساند ل 30 يونيو ... ولا اى حاجة من دى .



مراسلين الغرب كان بيشوفوا قدامهم الاخوان شايلين سلاح فى شارع جامعة الدول وفى الشوارع المحيطة بمصطفى محمود ، كان بيقول انه سامع فقط صوت اطلاق رصاص بس مش قادر يحدد مين اللى بيضربه ، كان بينقل البث المباشر لفض الاعتصام ولما تيجى اللقطات دى ، يحط مكانها لقطات مسجلة او ينتقل للاستوديو .


اوعى تقتكر ان الغرب ضميره وجعه فبيغير طريقته دلوقتى .. اطلاقا ..
الغرب بس لقى ان اى عقوبة هيفرضها على مصر فى الوقت الحالى هيخلى السعودية تقف مع مصر ، الغرب مصالحه مع السعودية اكبر من مصر و اللى بيحصل فيها ، ميقدرش يستحمل ان السعودية تنسحب من تحالفها معاهم خصوصا دلوقتى فى ظل الاوضاع فى ايران وسوريا .


من هنا اهمية انه يكون ليك قرار و انك تبقى صاحب قوة دبلوماسية وتتحكم فى مصالح الغرب من انك تكون تابع زى ما كنا للاسف فى ال 35 سنة اللى فاتوا ، معندكش حاجة تضغط بيها على مصالح الغرب للاسف غير اتفاقية كامب ديفيد اللى بيضغط عليك بيها اكتر ما انت بتضغط عليه بيها .