ما بعد 30 يونيه

ما بعد 30 يونيه

(1)


ايه اخبار العنجهية ؟؟
ايه اخبار الطمع والاستئثار ؟؟
كتبت الدستور لوحدك ؟؟
طلعت اعلان دستورى فاشى ؟؟
عينت اهلك فى كل حتة ؟؟
طبقت قد ايه من الشريعة ؟؟
جبت حق اللى ماتوا فى يناير ؟؟ طب اللى ماتوا فى عهدك ؟؟
ضحكت على الناس باسم الدين ونفرت منك حتى الاحزاب الدينية المتخالفة معاك ؟؟
سجنت المعارضة ؟؟ ايه اخبار تهمة ازدراء الاديان ؟؟ ايه اخبار تهمة اهانة الرئيس ؟؟
ايه اخبار تحقيقات الاتحادية ؟؟
حليت مشكلة واحدة من الخمسة اللى تعهدت بيهم فى الـ100 يوم ؟؟
جبت لمصر 200 مليار ؟؟

لمن الملك اليوم ؟؟
درس لكل من يظن نفسه فوق الشعب وان زبانيته وقوانينه ستحميه

(2)

لما تقول ان فلان من اهل النار .. ده اساءة ادب مع الله لأنك شاركته فى مغفرته ورحمته وتدخلت فى علمه هل سيغفر ويرحم ام لا


(3)


الاسلام اشمل واكبر من ان يعرب او ينسب للغة بعينها ، نظرتك للاسلام للاسف عنصرية وتظهر فى نظرتك لمسلم غربى على انه اقل منك و"لسه بيتعلم"

(4)

الاسلام اكبر من ان تحنى ظهرك و تثنى ركبتك وتخفض رأسك خمس مرات يوميا ، الاسلام يشمل ايضا معاملة و أخلاق و دعوة

(5)

علشان يحصل تدخل عسكرى خارجى محتاج امرين : ابراز مجازر ضد الاقليات وغياب للديمقراطية

فاهمين يعنى اللى بتحاولوا تعملوه



(6)


دلوقتى بقت تسجيلات 6 ابريل ضد التلفزيون المصرى من 3 سنين حلوة وبتتشير ، من سنة واحدة بس كانوا 6 ابليس و تلفزيون بيفضح بلطجتكم !!



(7)


حزب النور عايش دور المسكنة بتاع انا طيب زى محمود الجندى وكمال ابو رية ، بس الاعلام اللى بيخترنى فى ادوار الشر

دليل العقل الاخوانى قبل 30 يونيو

دليل العقل الاخوانى قبل 30 يونيو

(1)


الاخوانى يتداول اسطوانة عن فشل مرسى اول ما ينطق بأنه تم 24 مليونية منذ توليه

1- هو حد قالك انه جه بعد انتخابات نادى المقاولين العرب ولا بعد ثورة ؟؟
2- ثم لو ده السبب ما تقعد فى بيتك بدل ما تنزل عند نهضة مصر ولا رابعة العدوية ولا الاتحادية !!
3- ثم هو انتوا بتعاقبوا الشعب انه عمل ثورة ؟؟ بتقولوا له انت كنت عايش فى نعمة ورفستها قبل الثورة فلازم تكن بقى علشان نعوض عليك النعمة اللى زالت من وشك ؟؟


(2)


الاخوانى بيقول ان التيار الليبرالى والعلمانى مش بيطبق الديمقراطية

سعادتك ما التيار الدينى مش بيطبق الشريعة

(3)

الاخوانى بيقول ان الانشقاق بدأ عندما رفض حمدين صباحى اعطاء صوته لمرسى فى جولة الاعادة 

1- هو انت هتحاسب الناس على مواقفها السياسية ؟؟
2- هو مكانش فيه انشقاق قبلها عن طريق مليشيات تتصدى للمتظاهرين عند مجلس الشعب ، ناس بتغطى على هتاف يسقط حكم العسكر فى اول ذكرى للثورة ، ناس بتقول الكفرة هيصوتوا بلا على الاستفتاء ؟؟
3- هم اللى ادوا مرسى صوتهم لسه متحالفين معاكم ومع سياستكم الاقصائية ؟؟
4- لما يبقى الانشقاق هو ان حد لا يعطيك صوته فى الانتخابات .. فيه سفالة وقلة اصل اكتر من كده ؟؟




(4)

الاخوانى بيقول ان مبدأ التقية مش موجود غير عند الشيعة وبس 
طب ايه اللى جابه فى كتب حسن البنا و سيد قطب ومن بعدهم فى كلام مصطفى مشهور ولا دول كانوا شيعة ؟؟



(5)


طريقة منافقى مرسى الذين يدعون انهم شيوخ تذكرنى بقصة القسيس فى " يوم بعد يوم السبت " لجبرائيل ماركيز

فى البداية قال انه رأى الشيطان 3 مرات فقال الناس عنه انه مجنون ولم يعد احد يحضر قداسه
ثم بينما كان يهم ليلقى خطبه عن ان الشيطان يدخل للانسان عبر سمعه اذ جعله منظر تكرار موت العصافير فى القرية ورؤيته وجه شاب غريب فى محطة القطار يغيرها الى خطبة عن انه رأى اليهودى التائه
الاغرب ان الناس فى القرية جميعها حضروا القداس وانهالت عليه التبرعات !!

والحدق يفهم

 

(6)

عاوز تنصر القدس وعلى القدس رايحيين شهداء بالملايين يبقى فى القدس مش مصر الجديدة ، عاوز تحارب فى سوريا يبقى تبعت ولادك مش ولاد الناس الاول

فى ذكرى النكسة

 فى ذكرى النكسة

(1)



فى ذكرى النكسة ..
دفعت مصر ثمن النكسة نتيجة تولية الغير كفء فى المكان الاهم ، دخول الجيش فى كل امور البلاد .
من المفترض انه تم الدفع بالمتعلمين واصحاب الشهادات والدراسات فى القيادة العامة للجيش والتخطيط ، تم تجنيب الجيش الصراع السياسى فى البلاد .
للاسف زال المكسب الثانى بعد اكتوبر 73 بعد تغطية شرعية اكتوبر على شرعية الثورة كما اطلقوا عليها ، زال المكسب الاول تدريجيا وصولا الى ( احنا نطلع اشاعات اننا اشترينا طيارات جديدة ، احنا نهس عليهم دول الجوار )







(2)


مجلس الامة : هو القبة التى يجتمع تحتها البعض ليـ... إحم   للسلطة


 



(3)


حد جرب يضع الفحص الهرمونى من ضمن شروط الترشح للرئاسة ؟؟
على الاقل نخلص من حرف العين الجعورى المشكوك فى صحته عند اتخاذ مواقف






(4)


شعار اى مسئول يمسك منصب فى الدول العربية : " انا طول عمرهم بيقولوا لى انت ذكائك محدود وفاق كل الحدود "





(5)

التغطية الاعلامية للشعب المصرى بصراحة هرى ما بعده هرى ..جانب قاعد يفبرك صور علشان يطلع 28 يناير فى تركيا وجانب قاعد يفبرك تصريحات عن اعادة فتح المساجد ورفع الاذان على اساس كانوا بيصلوا فى الحمامات !!





(6)

لما تحاور واحد اخوانى تحس انك بتكلم واحد بيقولك انت قليل الادب وهو ممسوك نازل فى ملاية من شقة دعارة سياسية





(7)


الناس لقوا المانجة العايمة والاخوان لسه ملاقوش النهضة الغرقانة

فى ذكرى ضياع فلسطين

فى ذكرى ضياع فلسطين

الاعلام بشكل عام مركز هذه الايام فى ابراز ان الفلسطينى كان يعامل معاملة المصرى بدون ان تنطبق عليه القوانين بأمر مباشر من جمال عبد الناصر .. التعليم والتموين والسكن مجانى بل و 3 جنيه شهريا مصروف جيب لكل متعلم فلسطينى فى مصر

ظلت الامور كما هى حتى اوائل السبعينات ، حتى بدأ يعتمد على القانون بحذافيره ويخسر الفلسطينى فى مصر كثير من المزايا التى كان يحظى بها فى مصر ، حتى الان لم يتم تعديل القانون مراعاة لظروفهم .

هذا الحديث تناولته وسائل الاعلام الحكومية والخاصة فى اليومين الماضيين فى اكثر من برنامج وللاسف سيتجاهله المسئولون وتمر الايام ونعود للحديث عن " على القدس رايحين شهداء بالملايين " بدون ضمان حياة كريمة للفلسطينى فى مصر ، بدون فعل حقيقى نحو تحرير فلسطين ، ثم نعود السنة القادمة لنقول نفس الكلام !!

نظام الى مزبلة التاريخ

نظام الى مزبلة التاريخ 

(1)


تتفق مع احمد دومة او تختلف معه لكن احداث القبض عليه يكشف بوضوح مدى كذب و تضليل و نفاق ورياء النظام الحالى وكيف يتعامل مع القانون والدستور الذى كتبوه بأيديهم وتعهدوا بالحفاظ عليه وتغنوا به وما فيه ، كيف يستخدمونه كحذاء لخدمة مصلحتهم وقت اللزوم

فليتوقف الكاذبون والافاقون عن رواية ان مرسى منع حبس المتهمين باهانة الرئيس احتياطيا ، ليملكوا شىء من حمرة الخجل ان اساسا هناك من يحاكم بتهمة فاشية تثبت استبدادهم هى اهانة الرئيس دونا عن باقى موظفين الدولة ( وان لم يعجبك وخدم الدولة )

فليتوقف المتاجرون بالشرف و الثورة و الدستور و القانون ومن يتحدثون عن تطهير القضاء عن اكاذيبهم ونفاقهم حيث يتحدث دستورهم وقانونهم عن حق المتهم واهله فى فى معرفة التهمة ومدة ومكان الحبس الاحتياطى ، بينما يجعلونه مطية ودستور الهوى مع المعارضين

احترامك للدستور والقانون أولى مع شخص تختلف معه
عدم احترامك للدستور والقانون مع من تختلف معهم يكشف نفاقك وخسة نواياك
انه حتى لا يتفق مع صحيح دينك
( لا يجرمنكم شنآن قوم على أن لا تعدلوا )

يا من تتاجرون بالدين والثورة والقضاء




(2)


من مبادىء الحكم الشمولى صناعة خيمة منعزلة عن العالم الخارجى ، ليذكر من الكذب كما يشاء .. سيصدقونه

عن كتاب انجازات مرسى المخصص للاخوان وحدهم اتحدث .





(3)


عظيمهم سفيه .. فما بالك بأدناهم ؟؟





(4)

نظام يفخر بالاستدانة من طوب الارض ، يشحذ من الدول الاوروبية فيقابل بمنتهى الدونية وبدون اى مراسم رسمية او تتفق مع العلاقات الدبلوماسية !!

ومن اين لهم بالدبلوماسية ان كان القائم عليها فى البلاد هو الدكتور عصام الحداد الذى ليس اهلا لها 





(5)

نظام يحارب طواحين الهواء ومن شأنه ان يستمر فى صناعة اوهام عداوة مع قوى ومؤسسات فى الداخل هو نظام يغالط شعبه ويتصور انهم سذج وسيصدق انهم فاشلون لا ينجحون بسبب الحروب التى تمارس ضدهم بينما هم من يصنعوها لتأكيد الوهم 





(6)

الرقاصون على حبال النظام يتلونون ويبررون الفشل بعذر اكثر فشلا وهو النظام السابق بينما يتناسى امثال هؤلاء البهلوانات انه نظام بعد ثورة وليس نظام قادم من لدن النظام السابق

باسم و باسم

باسم و باسم 

(1) 

البعض يستكبر على المصريين الفرحة والابتسامة ويحارب باسم يوسف وبرنامجه محاولا اغلاقه بدلا من منافسة الفكرة بالفكرة

قد اختلف مع باسم يوسف فى بعض محتوى برنامجه وفى اللغة المستخدمة فى الخطاب احيانا .. لكن المحاربة بالمنع هى محاولة العاجز .

(2)


الناس اللى فرحانة ببسام عودة ويقولك وزير تموين محصلش بناء على صورة واحد رافع فيها عيش اكبر من صورة تانية قديمة فيها رغيف صغير

أولا : مش معنى ان الشعب المصرى اتعود على القرف انه يبقى القاعدة !! العيش الصغير ده عيش حيوانات ويستاهله اللى كان ساكت عليه !!

ثانيا : مين اللى قالك ان العيش كله فى مصر بقى كده ؟؟ احنا مثلا عندنا العيش بقاله اكتر من شهر بيتعمل اى كلام وده طبعا لأن الوزير باسم عودة اللى فرحانين بيه بيلف على فرنين تلاتة جنب مكتبه وسايب المحافظات

الوزير نشيط جايز .. مخلص فى شغله جايز .. لكن بيحصل مع كل ده انه يبقى برضه مش ناجح لأن المسئولية عمرها ما كانت بالتدين والاخلاق والنشاط فقط بدون كفاءة وحكمة وخبرة طرح حلول عامة

(3)

لما تسمع التصريح ده من واحد من خدامين مرسى والجماعة

عصام سلطان : فساد القضاء والزند وعبد المجيد محمود و عندى شكوك خبيثة اتجاه احمد مكى

أحمد مكى ؟؟
تبيعوا الراجل فى ثانية وتفسدوه علشان تصريح واحد قاله .. رغم انه كان ملاك بجناحين ومن رواد استقلال القضاء من يومين !!

الاخوانى كعادته يبيع ابوه الصبح لو مبقاش له لازمة الفترة الجاية معاه




(4)

شىء مقزز لا تجده الا فى الوطن العربى اللى بيكبر و بيتحرر ..

فصيل لبنانى رايح يقتل فصيل لبنانى على ارض سوريا علشان ارض لبنان لم تعد تتسع لصراعاتهم !!
بعد ان كانت لبنان الساحة الخلفية لسوريا .. صارت سوريا الساحة الخلفية للبنان

مش عارف ازاى وطنى بيكبر و بيتحرر وهو مليان غل و طائفية .. طب بأمارة ايه ؟؟



(5)

شىء مؤسف


وفقا لبعض المنظمات الحقوقية ..
3413 معتقل فى اول 9 شهور لحكم محمد مرسى

إسأل السيد الرئيس

إسأل السيد الرئيس 

(1)


تسمية صفحات الفيس بوك اصبحت محيرة فعلا فى بعدها عن الحقيقة

مثلا كثير من الصفحات تحمل اسم شخصية عامة ويديرها غيرهم بل واحيانا لا يعلمون عنها شيئا

ايضا كثيرا من الصفحات لا تحقق الهدف المرجو منها اطلاقا بل هى مصممة لغرض اخر ، فمثلا لم نسمع عن ان النظام العلمانى فى اوروبا ارتعب خوفا من صفحة ( مكافحة العلمانية ) ، كما لم نسمع عن ان اوباما طالب مخابراته بمعرفة ادمن الصفحة واعتقاله فى جوانتانمو

ايضا كثير من الصفحات اسمها لا يعبر عن الواقع ، فمثلا صفحة ( كلنا خالد سعيد النسخة الاسلامية ) ، لم نعرف فى يوما عن ان خالد سعيد شهيد الاسكندرية كان اسلامى التيار السياسى - ولو كان لظل حيا الى اللحظة لأن بالتأكيد كان شيخه يأمره أن يطيع اولى الامر- ، كما ان خالد سعيد الدعوة السلفية الذى يشمت فى موت الناس لا اعتقد انه النسخة النموذجية الاسلامية .. كذلك الحال لصفحة مثل ( د. محمد مرسى رئيس الجمهورية ) !!




(2)


مش عاوز ابقى متحامل على شخص الرئيس وثقافته .. وبالتالى هفترض ان اللى بيستخدم الاكونت بتاعه وبيرد على الاسئلة شخص اخر

لكن الشخص ده من الجهل بحقيقة الامور التى تمر بها البلاد لدرجة انه يخر جهلا

سيبك من انه انتقى الاهل والعشيرة يرد عليهم فى دعوة الامس لتوجيه اسئلة له .. مش مهم

لكن يرد بكم الجهل بالواقع ده ؟؟
زى مثلا يقولك "نعمل على استقرار سعر الدولار " وكأن الدولار هو اللى ارتفع مش الجنيه اللى بقى فى الارض ، حتى لو اللى سألك سأل غلط ، كان لازم تصحح من خلال ثقافتك !!

زى انه يرد على سؤال هل هناك خطة اقتصادية بأنه "هناك خطة اقتصادية " يا فرحتى !! نورت المحكمة !!

لاحظ انى مفترض ان واحد تانى اللى بيستخدم الاكونت مش الرئيس نفسه





(3)


فاكر مشهد فتحى سرور وهو بيقول "الموافق على كذا " ويقول موافقة قبل ما يبص ؟؟
بيتعمل كل يوم فى مجلس الشورى وعادى محدش اعترض !!






(4)

الاخوان ميقولش " الثورة بتاعتى " .. يتاكل
الاخوان يقول على الثوار فلول او بيطالبوا بعودة نائب عام مبارك او ممولين من الخارج او يقول على نفسه لما يتبلطج قانونيا انه بيحمى مكتسبات الثورة ضد الثوار اللى بيسميهم بلطجية
انما حتى فى الكذب مبيعرفش يقولها مباشرة فى وشك
مش عارف يكذب و يقول انه هو الثورة وانك فلول وان الثورة هى انه يحكم وغير ذلك مؤامرة






(5)

- عاوز طماطم
- اتفضل
- ياعم دى مش طماطم
- لأ دى طماطم
- هو الطماطم لونها ايه ؟؟
- أحمر
- بس دى مش أحمر
- بس دى طماطم
- ليه ؟
- علشان الطماطم لونها أحمر
- يا عم انت مش لسه قايل ان الطماطم لونها أحمر وان دى لونها مش أحمر ؟؟
- على فكرة انت بتغير الموضوع وبتدخلنا فى حوارات فرعية

نفس اللى حصل لك دلوقتى هو اللى بيحصل لكل مشاهد قاعد بيتفرج على شخصية من الاخوان بتطلع فى الاعلام

ملحوظة : بالرغم من انهم مش بيسيبوا منفذ اعلامى ولو خرم الدش اللى على سطوح بيتكم علشان يطلعوا فيه إلا ان الشعب يريد تطهير الاعلام :)

للنفاق والكذب والتبرير حدود