قبل انتهاء الفرز

قبل انتهاء الفرز

الانتخابات خلصت ؟؟ نتكلم بقى براحتنا على اللى كنت عاوز اقوله امبارح ومستنى لما يقف التصويت


عندما تنظر الى موقف الجميع فى تلك الانتخابات تجد انه مخزى

الانتخابات عرت الجميع


التصويت فى الداخل لن يخرج عن نظيره فى التصويت فى الخارج وفى النتائج
الاخوة المقاطعين قعدوا يعاملوا الناس بقرف وعلى اعتبار انهم مثلا بتاع 20 مليون ونسيوا الخيبة التى حدثت فى انتخابات الرئاسة 2012 عندما دعوا للمقاطعة فكانت نسبة المشاركة اعلى فى جولة الاعادة عن الدور الاول


الحمد لله عندهم نفس عقدة الاخوان .. كله قاعد جوه الخيمة بتاعه وبيكلم نفسه فى المرايا
انت ولا ليك تلاتين لازمة فى الشارع ومتعرفش تعمل حاجة لوحدك وعددك اقل بكتير ما انت فاهم والانتخابات عرت سيادتك لما قلت انا مقاطع وفجأة تانى يوم .. الحق ده السيسى منزلهوش حد ويالا نساند حمدين علشان يكسب !!!

جبت الكلام الاهبل ده منين ؟؟
لسه مش مصدق انك مش شايف الصورة كويس ؟؟

اسمحلى كمان اوصفك بالاهبل لما تقول " الدولة العميقة " و " اجهزة الدولة اللى بتساند مش عارف مين "
وفى الاخر حضرتك كنت اول واحد يضحكوا عليه !!



اجهزة الدولة ..
واولهم اللجنة العليا للانتخابات ..
حالة من التصنع مقصودة او غير مقصودة بوجود منافسة حقيقية وعدم وجود اقبال ..
ربما يكون الهدف حشد اكبر عدد ممكن ، عرفوا يضحكوا على الناس علشان يستنفروهم ؟؟ جايز بس ده لو صح يبقى حاجة تفرح ان لاول مرة بشوف اجهزة الدولة عندها خطة وتكتيك .. واشك فى ذلك
لكن قرار المد للتصويت لليوم الثالث جاء خاطئا من كل النواحى
ما الفائدة ان كان الرئيس سينجح قانونيا ب 50 % بالاضافة لشخص ؟؟
ما الفائدة من التكديس والكبس ؟؟
الموضوع مش سبق خيل حضرتك ولا مسابقة اولومبية عاوز تكسر رقمها القياسى !!


حمدين صباحى .. يعود ليثبت وجهة نظرى فيه وهو انه رجل وطنى محترم مخلص ينظر لمصلحة بلده ، لكن الطبيعى انه يقود الشباب ويكسبهم من خبراته وليس ان يكون مسيرا بواسطة الشباب .. واللى بالمناسبة شتموا فيه بوضاعة معهودة ومزايدة مكررة بعد ما اخذ قراره !!


حملتا المرشحين .. السيسى وصباحى ..
حملات وليدة لا خبرة لها فى العملية الانتخابية ، لا يجيدون قراءة الارقام والدعاية ، لا يجيدون الحشد والتعبئة والتوجيه .. وهو اهم ما يميز من يملك خبرة انتخابية


الاكاذيب والضلالات
ثبت كذب كل الاضاليل من نوعية " الحزب الوطنى بيساند السيسى و الاخوان بيساندوا صباحى "
طرق الحشد من الطرفين دول محفوظة ومعروفة ولم تشاهد فى اللجان الانتخابية
مفيش حشد ولا توزيع فلوس ولا جمع عمال فى سيارات من المصانع للجان مباشرة !!
مفيش !!
فين الاكاذيب اللى بيروجها البعض ؟؟
فين التضليل اللى كانوا بينشروه ؟؟


عموما فى الموضوع ده فائدة كبيرة لو احسن السيسى استغلاله .. لأنه فعلا دلوقتى مش محمل بجميل لحد ، يقدر ينتقم من شلل الفساد ويطالهم بقراراته باريحيه كبيرة والناس هتسانده لو عمل كده


الاخوان لسه عايشين فى قصة التشوية والتضليل والتركيز على جزء من المشهد زى وصف انسان بانه مكون من شعر اسود علشان مشوفتش غير ربع راسه !!
الغل والحقد لسه بيدفعهم علشان يزوروا الصورة ويكدبوا ويصدقوا الكدبة !!
لكم الله


الغرب وفكرة الاستعراض بالارقام قصاده
موضوع تافه وان كان يستحق تفنيده
اولا الغرب هيعترف بالرئيس الجديد اى كان نسبة نجاحه او عدد المصوتين له
ثانيا هذا العدد تجاوز اكثر ما حصل عليه اى رئيس من قبل فى تاريخ مصر فى نهاية اليوم الثانى فما فائدة اليوم الثالث ؟؟
ثالثا الغرب منذ انسلاخه وهو يعبأ فقط بمصلحته ، الديمقراطية والعدالة والحياد والموضوعية يدعو لها عندما تكون على ارضه وداخل حدوده فقط ولن يرضوا عنك الا لو توافقت مصلحتك معهم
رابعا المهم ارضاء الشعب وليذهب الغرب للجحيم لو كان له الاولوية


جارى الفرز .. جارى التأكيد

مصر تنتخب

مصر تنتخب

(1)

اللى فهمته من برنامج صباحى امبارح انه تقديم خيرى رمضان ومجدى الجلاد

انا هديك فدان فى وسط الصحراء ومش واصل له اى مرافق ولا طرق ولا اى حاجة واديك قرض 10 الاف جنيه ومليش دعوة بيك واجى احبسك فى الاخر بعد ما المشروع يفشل !!

 

معاك ارقام يا صباحى ؟؟
لا والله نسيتها فى البيت

يعنى انت جى تقول برنامج ولا جى تهرج ؟؟
لأ انا جى القح على السيسى

 

 

 

 

(2)

 

الناس كلها شايفة فى السيسى نحنحة ، انا الصراحة مش شايف غير العند ، دائما كانت افة الرئاسة فى مصر العند 

 

 

 

 

(3)

 

وزير العدل لما يطلع يدافع عن القضاء المفروض يقعد فى بيتهم تانى يوم لأن المفروض فيه حاجة اسمها استقلال القضاء عن السلطة التنفيذية اللى هو منها ، حمدين صباحى لما يقول هعمل فى القضاء يقعد برضه فى بيتهم لأنه على اعتبار انه رئيس جمهورية وبرضه من السلطة التنفيذية .

 

 

 

(4)

 

  

لو فاكر ان مبارك بس اللى كان بيلوم الشعب على مشاكله تبقى غلطان .. الموضوع ده تقليد فى الحكومة المصرية .. ولو مش مصدق احضر اى اجتماع شهرى من اللى بيتعمل فى اى حتة فى الحكومة علشان تسمع الرئيس بيقول للمرؤسين ان انتوا السبب فى الفشل وان احنا معليناش حاجة ومش بعيد يدخل عليها مسحة دينية من نوع حرام عليكم وهتتحاسبوا قدام ربنا .

(5)

الاستثارة العصبية والغضب اللى بينتاب السيسى كلما يذكر شىء عن الجيش غير موضوعى ولا يصح .. المفروض ان سيادتكم تقدم نفسك كمرشح مدنى .. ايضا يجب الفصل بين كونك ابن المؤسسة وكونك مترشح لقيادة المؤسسات كلها .. المستشار عدلى منصور يحترم حقيقة فى اعطاء القدوة فى هذه النقطة كأبن لمؤسسة القضاء لا يتدخل ولا يبدى اى رأى عن القضاء طوال فترة رئاسته .

(6)

 الجلوس فى المنزل معتمدا على ان مرشح معين سوف يفوز ويكتسح لا يفيد .. 

شارك لممارسة حقك الذى انتزعته بثورتين .. 

شارك من اجل اضفاء منافسة حقيقة او شعبية حقيقية .