مكاشفة
(1)
الشعب المصرى اصلا ميفرقش معاه اى تطبيق لسياسة التقشف .. ايش ياخد الريح من البلاط !!
(2)
فى اى دولة قانون فى العالم المسئول عن التصدى لأى احداث عنف هو الشرطة ، لا تجد فى ذلك عيبا الا فى مصر
(3)
مشكلتنا مع الاخوان انهم فاهمين انهم الوحيدين اللى بيتظلموا على طول
مشكلتنا مع السلفيين انهم فاكرين انهم الوحيدين اللى عندهم دين
مشكلتنا مع جبهات الثوريين انهم فاكرين انهم مبيغلطوش ابدا
مشكلتنا مع الزييطة انهم فى وسط كل دول وفى وسطينا احنا شخصيا
(4)
شايف ان السيسى وحش وفاشل ومينفعش ومش عاوزه يترشح رئيس ، لكن لو مرشحك كسب عاوزه يسيب السيسى وزير دفاع !!
(5)
هو ليه الناس بتاخد مقال رأى عادى او تغطية لصحفى مصرى نص كم فى صحافة غربية على انها حقيقة لا جدال فيها ؟؟
طب ما شتموك قبل كده
وبيسموا الفلسطينيين ارهابيين
وبيقولوا على اسرائيل بتحمى امنها القومى من امثالك
وبيقولوا على امريكا بتدافع عن الديمقراطية
!!
هيفضل الموضوع ده محير الواحد كتير فعلا
(6)
الدور اللى بيعمله ابراهيم محلب فى ازمة اسوان ممكن يعمله يحيى شاهين فى فيلم جعلونى مجرما بس مينفعش يعمله رئيس وزراء خالص
(7)
امير قطر اصدر قرار بجعل التجنيد اجبارى .. طب بالنسبة للمجنسين هل ينطبق عليهم القرار ؟؟ طب هل يُضمن ولائهم ؟؟
(8)
اهداء الى نشطاء النت
يا مصري ليه دنياك لخابيط والغلب محيط
والعنكبوت عشش ع الحيط وسرح ع الغيط
ومهولاتي تحب تزيط
ساعة الفرح زغاريد تنطيط
وفي المياتم هات يا صويت
وفي المظاهرات سخن تشيط
و في الانتخاب تنسى التصويت
سيد حجاب
